Operatori mobil IPKO, nga dita e premte (2 maj), ka startuar me produktin e ri IPKOMat, i cili u mundëson konsumatorëve që të mbushin llogarinë në telefonat mobil, ditë e natë, përmes bankomatëve të ProCredit bankës.

IPKOMat, në krahasim me ofertat e tjera në treg është një shërbim shumë fleksibil i cili mundëson që shuma e mbushjes të përzgjidhet nga vet konsumatori. Duke përdorur kartelat bankare konsumatorët e IPKO-s do të mund të mbushin llogaritë e tyre në vlerat që ata dëshirojnë, duke u nisur nga 5 euro deri ne 100 euro.

Konsumatorët e IPKO-s, gjithashtu mund të mbushin sipas dëshirës së tyre edhe llogaritë e të afërmve dhe miqve të tyre.

“Përmes shërbimit IPKOMat ne po e shtyjmë edhe një hap më përpara vizionin tonë që t’i afrohemi konsumatori aq afër sa ai të mos shpenzoj kohë dhe mund për të pasur qasje në shërbimet tona. E gjithashtu po i heqim hap pas hapi cilado kufizime që janë vendosur në treg”, tha drejtori ekzekutiv i IPKO-s, Akan Ismaili.

Shërbimi IPKOMat, është i sigurt, i shpejtë dhe shumë i lehtë për t’u përdorur. Në secilin bankomat të ProCredit Bankës janë vendosur edhe udhëzimet për përdorim të shërbimit, që procesin e mbushjes së llogarive e bëjnë skajshmërisht të lehtë.

Produkti IPKOMat, është fryt i bashkëpunimit ndërmjet IPKO dhe bankës ProCredit. “Shërbimi IPKOMat u mundëson klientëve të bankës ProCredit që përmes bankomatëve t’i kreditojnë telefonat e tyre mobil, duke përdorur vetëm kartelat e tyre bankare. Pra si shërbim është tejet funksional dhe klientëve tanë u jep qasje dhe mundësi për ti kryer shërbimet e tyre 24 orë në 7 ditë të javës në 84 bankomate të vendosura në mbarë Kosovën”, tha Florin Lila zëvendësdrejtor gjeneral i ProCredit Bankës.

ProCredit Bank është banka e parë në Kosovë që ofron një mundësi të tillë. Që të gjitha degët e ProCredit Bankës gjithsej 50 në tërë territorin e Kosovës janë të pajisura me teknologji dhe standarde të larta evropiane, përfshirë edhe bankomatet, dhe që të gjitha degët janë të hapura gjashtë ditë të javës.

Telegrafi

Siç ka vendosur Dell, të njëjtin shembull kanë vendosur ta përcjellin edhe Lenovo, por edhe Hewlett Packard. Natyrisht, bëhet fjalë për vendimin se në kompjuterët e tyre, të cilët, përkundër sistemit më të modernizuar operativ Vista, ende do të përdorin atë XP i cili është pothuajse një dekadë i vjetër.

Dell ka paralajmëruar se me kompjuterët e tij do t’i shes me Windows XP edhe pas përfundimit të tij më 30 qershor, duke shfrytëzuar të drejtën e downgrade-it, Lenovo ka vendosur për një hap të ngjashëm, por në vend të instalimit të sistemit operativ në kompjuterë do të ofrojë CD-në Windows XP Recovery bootable i cili pa ndonjë problem kalon mbi Vista. Me instalimin e sistemit XP me Recovery CD, do të instalohen edhe të gjithë driver-at e nevojshëm, derisa opsioni i përdorimit të dual-boot nuk do të jetë i mundur.

Ky opsion ka qenë i ofruar në Lenovo edhe më herët, por ka qenë në plan të praktikohet deri më 31 korrik, një muaj pas ndalimit zyrtar të shitjes dhe ofrimit të mbështetjes nga ana e Microsoftit për shfrytëzuesit e Windows XP.

Situata e porsakrijuar do t’i mundësojë Lenovos shfrytëzimin e kësaj mundësie deri në fund të muajit janar 2009, derisa Dell këtë opsion do ta shfrytëzojë për aq kohë sa Microsoft do të mbështes opsionin downgrade.

Prodhuesi i tretë i cili dëshiron t’i bashkohet Lenovos dhe Dellit është HP, mirëpo data dhe mënyra se si do ta bëj këtë nuk është definuar ende.

Telegrafi

Kompania gjermane Wiesmann vitin e kaluar, gjatë panairit të automjeteve në Frankfurt, ka paraqitur konceptin atraktiv me emrin MF5, të cilin nga kupetë tjera ekzotike e dallon fakti se ai futet në lëvizje motori i marrë nga BMW M5.

Tash ka ardhur lajmi se MF5 zyrtarisht do të shkojë në prodhim dhe atë në fabrikën e hapur qysh para një jave.

Gjatë vitit të ardhshëm do t’i bashkohet edhe versioni kabriolet.

Siç edhe thamë, motorin të cilin e përdorin M5 e M6, sigurojnë performansa fantastike.

Me peshë të karrocerisë prej 1.380 kilogramësh dhe fuqi 507 KF, MF5 është në gjendje të arrijë shpejtësinë deri në 100 kilometra në orë për vetëm 3.9 sekonda.

Marshi gjithashtu është i BMW-së, prej shtatë shpejtësish, derisa për frenim janë përgjegjës disqet e qeramikës.

Automjeti është i gjatë 4.3, i gjerë 1.95 dhe i lartë vetëm 1.17 metra, derisa karroceria është e përpunuar nga alumini me zbatimin e metodave më bashkëkohore.

Telegrafi

Advanced Micro Devices (AMD), prodhuesi më i madh i mikro-procesorëve pas Intel-it, ka paralajmëruar masa drastike, një numër të madh të largimeve nga puna për të zvogëluar humbjet e mëtutjeshme.

AMD ka shënuar humbje të mëdha në tremujorin e parë të këtij viti, ndërsa fitimi i pritur për çerekun e parë kap shumën prej 1.5 miliardë dollarësh, që është 15 për qind më pak se profiti në periudhën e njëjtë të vitit të kaluar.

Numri i përgjithshëm i punëtorëve të larguar do të jetë rreth 1.600, largimi i të cilëve do të kryhet deri në tremujorin e tretë, derisa me fillimin e tremujorit të dytë pritet pagesa e të gjitha ristrukturimeve të kompanive. Rezultati i profiteve tremujorëshe është rënia e shitjes në të gjitha segmentet e prodhimit të AMD-së.

Telegrafi

Themeluesi i Microsoftit, Bill Gates, i pyetur se kur pritet të jetë gati sistemi i ri operativ, Windows 7, është përgjigjur se kjo do të ndodhë gjatë vitit të ardhshëm.

Takimi në bankën Inter-American Development ka rezultuar me deklaratën e Gates-it se trashëguesi i Vistas do të jetë gati shumë shpejt, megjithatë zëdhënësi i Microsoftit ka deklaruar në anën tjetër se, sistemi operativ do të jetë në dispozicion vetëm rreth vitit 2010, që është rreth tri vite pas daljes në treg të Vistas në janar të vitit 2007.

Megjithatë, siç e shohin ekspertët, vlerësimet e Microsoftit për daljen e trashëguesit të Vistas janë tepër optimiste.

Të takimin e përmendur Gates, gjithashtu ka pohuar se me entuziazëm të madh i sheh ndryshimet e mëdha të cilat do të ndodhin në të ardhmen afërt, duke menduar në Windows 7, mirëpo nuk ka përmendur asnjë detaj të këtyre ndryshimeve pos që programi zhvillimor ka filluar dhe ka indikacione për përdorimin testues të versionit me emrin Milestone 1.

Koha ka kaluar për zhvillimin e Windows XP dhe Vista, ndërsa deri tek produkti përfundimtar ka kohë edhe një vit, thuhet në faqen e internetit Ars Technica.

Telegrafi

Nokia ka vendosur të bëj një hap të madh për t’iu kundërvënë pajisjes më të popullarizuar celulare iPhone, pasi që thashethemet për Nokian e re Tube po bëhen çdo ditë e më të vërteta.

Ekzistimin e Tube e ka vërtetuar Tom Libretto, nënkryetari i forumit Nokia në fjalimin e e tij të mbajtur në konferencën Evens Data në Shtetet e Bashkuara të Amerikës.

Në fakt, bëhet fjalë për një pajisje celulare me të cilën pothuajse në tërësi udhëhiqet nëpërmjet ekranit të ndjeshëm në prekje, sikur edhe në iPhone dhe shumë “humbës” të quajtur “iPhone killer”.

Në fotografitë të cilat kanë rrjedhur në internet shihet tërësisht pjesa e përparme e cila është ekran, derisa emërtimi i plotë i kësaj pajisje multimediale do të duhej të ishte Nokia 5800 Tube. Të dhënat e varfra mbi Nokian e re janë se ka ekran prej 3.2 inçësh me mundësi të paraqitjes së 16 milionë ngjyrave, sigurisht do të jetë 3G që aktualisht është përparësi ndaj iPhone-it.

Opsionet standarde do të janë lidhje Wi-Fi, bluetooth, sigurisht edhe GPS si dhe kamerë prej 3.2 megapikselësh. Softuer i cili do të bashkojë të gjitha funksionet e Tube-it me gjasë do të jetë ndonjë Symbian i prodhuar veçanërisht për këtë pajisje. Të dhënat e fundit flasin për dalje për televizion dhe peshë prej 104 gramësh. E vetmja që mbetet është të presim me durim edhe një tentim të pajisjes celulare e cila do të tentojë të ndalojë superfuqinë e iPhone-it.

Telegrafi

IBM ka paralajmëruar një teknologji të re për ruajtjen e të dhënave, të cilat do të mund të zëvendësonin disqet e forta dhe flash memoriet tradicionale.

Këto memorie, të quajtura “racetrack”, do të kenë një kapacitet 100 herë më të madh krahasuar me memoriet e deritashme. IBM beson se pajisjet për ruajtje të bazuara në spirotronikë u kanë mundësuar mp3-player-ave kapacitet prej disa terabajtëve dhe një punë shumë të shpejtë.

Të dhënat janë ruajtur në shkoptha të nano-telave magnetik në pllakë silikoni. Këto shkoptha i ruajnë të dhënat në spinin e elektroneve. Kjo teknikë e ruajtjes së të dhënave, në nanoteknologji njihet si spintronikë.

Shkencëtarët parashikojnë se kjo teknologji e re do të fillojë të prodhohet për shtatë deri në dhjetë vjet.

Telegrafi

Kompania IPKO për katër muaj ka arritur të përfitojë 250 mijë konsumatorë në telefoninë mobile, dhe të vendosë nëpër Kosovë 150 antena bazë, përmes të cilave u ofrohet sinjali i telefonisë mobile i kësaj kompanie 76 për qind të banorëve të Kosovës. SIM kartela e 250 mijë e IPKO-s është blerë të hënën në Pejë. Konsumatori që bleu numrin është falënderuar si dhe ka marrë dhuratë një telefon mobil nga drejtori ekzekutiv i kompanisë, Akan Ismajli. IPKO filloi operimin e shërbimeve të komunikimit mobil më 14 dhjetor 2007, duke nisur punën me koncertin e yllit të muzikës rep 50 Cent. /Express/